Le fin dl Istitut de Medejina Genetica é chël de contribuì, tres l’adoranza sistematica de tecniches scientifiches aplicades tl ćiamp dla genetica y dl’epidemiologia, al stüde sön les maraties che an ërpa y sön les maraties ambientales.
I resultać dl’inrescida é la fondamënta dla diagnosa fata por tëmp, la prevenziun y la cura de tröpes patologies.

Südtirol sciöche teritore de inrescida
Südtirol, che é ponü tl zënter dl’Europa, rapresentëia ćiamò incö na isola culturala y linguistica cun na popolaziun plü o manco valia da n punt de odüda genetich, n sistem sanitar dër svilupé y n archif genealogich unich de süa sort. Chëstes é les condiziun ideales por studié la combinaziun de gens, maraties y ambiënt.

Impostaziun multidisciplinara
L’inrescida sön la medejina aplicada al paziënt y la comunicaziun asvelta di resultać dl’inrescida ai ambulatori locai costituësc n vantaje diret por la popolaziun südtiroleja.
Le conzet integratif se respidlëia ti ćiamps desvalis de inrescida scientifica che costituësc l’istitut de Medejina Genetica: tlinica, epidemiologia, genetica, bioinformatica y storia.
La colaboraziun sterscia cun les strotöres de medejina generala y spezialistica locales y l’inrescida scientifica fata a livel internazional garantësc la competitivité scientifica nezesciara y pormët de sfruté l’efet sinergich sides da n punt de odüda tematich, co da n punt de odüda organisatif.

Conescënzes nöies –domandes nöies
Tl’êra dla genetica fej le contat permanënt cun l'opiniun publica a na moda che la popolaziun sides bona de svilupé n pinsier autonom y critich ti confrunć dla sciënza sön la medejina.
Le confrunt scientifich cun aspeć etics, legai y soziai dl’inrescida genomica é na pert importanta dl setur de inrescida.