L ladin, rujeneda che à n dauni

de Roland Verra

Kurt Egger scrij te n si liber sun problematiches linguistiches te nosc raion che l ladin ie na rujeneda che à n dauni. Chësta crëta te l daunì dl ladin nes fej legrëzia y nes dà ardimënt, iust cunscidran i gran problems che nes cunfruntea uni di tl mpëni de varenté nostra rujeneda y nosta cultura.

Ma possen pa veiramënter se tò a di che l ladin vif n gran revival aldidancuei, o se tratel pa mé de na imprescion dedoravia che ne toca nia a fonz la situazion réela dla mendranza?

L ie segurmënter deplu sënies de n renascer dl ladin almanco te cërta pertes de nosta cumenanza y te cër raions. Da una pert se renfurzea l’azentanza soziela y l’auto-identificazion de vel grupa te si vester ladins, sciche desmostra la nrescida dl ASTAT sun i jëuni dl 1994. Tlo vënel nchinamei rujenà de "prozesc de mobilitazion etnics tla grupa de rujeneda ladina".

L ie pona nce autri simptoms positifs, per ejëmpl tla publicazions ladines, che ie cresciudes dassën sibe te numer che te livel, ti media, che ultimamënter à udù na vëira fluridura de plates ladines, tla standardisazion y modernisazion dl lingaz, che vëij ncueicundi finalmenter la culaborazio de duta la majera istituzions tl proiet SPELL. Scumenciadives cultureles y legislatives à te chisc ultimi tëmpes purtà pro a n se auzé dl tenor dla discuscion ntëur ai Ladins y a si rejons sibe tla Provinzia de Bulsan che te chëla de Trënt.

Dal’autra pert ne mancia nia i problems mò davierc: la ciampanilism y la setorialisazion di ntresc dla valedes y dla grupes tla sozietà de nosc luesc vën suvënz strumentalisei per polemiches steriles che manacea l teni adum dla grupa. N cër provinzialism de posizions y la dependënza da modiei culturei de importazion ti ie te strada a n prozes autodinamich tl avané de na cultura che possa se muserè, fajan la drëta proporzions, cun la majeres ntëurvia. L’ibridism linguistich-culturel de truepes luesc dla Ladinia possa unì udù sciche n prim var de viers de na assimilazion, che en pert ie bele unida a sl dé te vel pertes dla populazion.

La situazion ie perchël a balanz danter manaceda de sfanté y progres de viers de na situazion "normaliseda" y de segurtà per la grupa ladina tla Dolomites.

I vares per se desgorjer da n prozes negatif ie de plu sortes, ma l plu mpurtant de dut ie la liedëza dla cultura y dla cuscienza. Bele da ani jons inant a dumandé n mieur coorinamënt culturel danter lies y istituzions, ma chëse ne daussa nia unì ntendù sciche regulamentazion o la ulentà de strënjer ite l svilup liede dla azion culturela. Adurvon prospetives plu lerges de culaborazion danter i Ladins dla Dolomites y cun i Ladins dl Grijon y dl Friul.

L fossa nce gran ëura de giaté l recunescimënt tl mond academichechh, sibe tla formazion di nsenianc per ladin, tudësch y talian, sibe tres la istituzion de n istitut de Ladinistica tla Università de Bulsan. Sce ulon na vëira promozion dl plurilinguism tl program de chësta Università , vala nce de teni cont dla rujeneda ladina, che ie lingaz ufiziel te chësta provinzia. L’azion de nrescida y de discuscion academica n cont dl ladin pudëssa vester de gran valuta per la prospetives dla promozion dl ladin. Sce na rujeneda che ie tl lëur de se stabilisé y de se modernisé possa fé referimënt a na Univeristà locala, giaterà duta la discuscsion ntëur al ladin na cualità plu auta che sarà de gran aiut per resolver la spartizions y la contraposizions de aldidancuei.

Povester vënel ratá che n tel Istitut de Ladinistica ne ëssa nia n gran ciamp de azion, ajache l ie massa spezialistich. Ma sce n mët adum la funzion de nrescida sun l lingaz cun chëla de formazion di nsenianc tl ciamp dla rujeneda y cultura ladina, pona capëscen che n tel Istitut ie plu che giustificá y debujën. La sënta de chësc Istitut pudëssa vester tla facultá de scienzes dl’educazion, ulache l pudëssa nce fé la funzion de sezion ladina che muessa coordiné la formazion paritetica di nsenianc ladins. Tl medemo tëmp pudëssl cunlauré cun autra faculteies y cursc dl’Università per dut chël che á danfé cun studiesc sun l plurilinguism y la elaborazion di lingac.

L muessa unì fat n gran sforz uniter te uni ciamp dl cunviver soziel per enravisé ite l ladin y per ti dé presënza recunesciuda (status y prestige planning). N ne daussa nia se lascé passivamënter sun la crëta te normatives arjontes, p.e. l sistem paritetich dla scola ne garantëse nia "eo ipso" l seuraviver dl ladin, sciche velun miena, nce te chësc ciamp muessen, cialan a uni maniera de seguré la cualità dl tudësch y dl talian, promuever aladò nce l ladin

L ie massa saurì unì docá cun slogans ala "n popul seuravif, sce l uel", tlo rujenons de rejons y de dërc statuters, perchël ne iel nia mé n problem di Ladins y de si ueia de resté ladins, ma nce dla populazions ujines y de si representanc pulitics che à nscì l mesun de desmustré si ulentá de sustenì solidarmënter la etnìa ladina te si autonomia.

Dr. Roland Verra, Ladinischer Schulamtsleiter

Abstract :
Das Ladinische, Sprache mit Zukunft

Dem Ladinischen werden neuerdings bessere Zukunftschancen, auch von Seiten der Sprachwissenschaftler eingeräumt. Es lassen sich, bei näherer Betrachtung, die Symptome eines vielversprechenden Revivals erkennen, die allerdings über die gravierenden Probleme dieser bedrohten Minderheitensprache nicht hinwegtäuschen sollten. So stellt man einerseits ein erfreuliches Wachstum im Bereich der Literatur, der Medien und der linguistischen Studien fest, andererseits verbleiben schwerwiegende Mankos, was den inneren Zusammenhalt und die Innovationsprozesse der Minderheitenkulturen anbelangt.

Einen wichtigen Beitrag für die Verbesserung der Zukunftsperspektiven des Ladinischen kann die Errichtung eines eigenen Instituts für Ladinistik an der Universität in Südtirol leisten. Dieses könnte sowohl in der dreisprachigen Ausbildung der ladinischen Lehramtsanwärter als auch in der Erforschung und Modernisierung des Ladinischen eine zentrale Rolle spielen, zumal das akademische Milieu eine freie und neutrale Instanz für die Austragung einer unvoreingenommenen und konstruktiven Diskussion über die Zukunft des Ladinischen darstellen könnte