Da d'altonn dl 2002 él stè plü de 13.000 vijitadus che à tut pert ala inaudaziun dl gran frabicat tla Alea Druso 1, la sënta nöia dl'EURAC plü conesciüda a Balsan cun l'inom de „Ex-Gil". La strotöra é gnüda proietada da trëi architëć padovans, sön inćiaria dla Opera Nazionala Balilla, y ara é gnüda fata sö danter le 1934 y le 1936, por ti dè alberch ales jones scrites ites ala GIL („Gioventù Italiana del Littorio").

Inaudaziun 13.09.2003

Da ilò incà é le frabicat, batié danü sciöche „Ex-Gil", gnü adorè por de vigni sort, sciöche supermarćé y chino pornografich, jon tres deplü en rovina. L'arpejiun pesoćia che al â da portè sciöche protlam architetonich dl fascism à dî alalungia archité sö vigni tentatif da adorè indô danü i locai (Por de plü informaziuns ćiara la publicaziun EURAC. Una casa per l'Accademia Europea bolzano. Architettura – Storia – Ricerca).

Impormò dl 1995 él gnü scrit fora n concurs internazional de architetöra por trasformè döta la infrastrotöra tla sënta nöia dl'EURAC: cun chësc proiet de inrescida propositif orôn apajè ia i recorć dla jënt. La gara é gnüda slariada fora sura i confins regionai fora; indöt él gnü presentè 56 proieć danter chi che la iuria à chirì fora ala unanimité la proposta dl architët Klaus Kada da Graz. Dlungia d'ël él gnü cherdè ite inće l'artist Mandred Aloys Mayr, che ti é stè do al conzet cromatich, che dê mostrè sö indortöra la strotöra dles lercs daìte tl frabicat.

Tres la restrotoraziun àl messü gnì chirì na soluziun dantadöt por le problem dl lian stilistich danter les lercs vedles y nöies, tl respet dles obliaziuns de sconanza dades dant dala Suraintendënza ai Bëgns culturai.
Le resultat é n complès de ca. 1.300 metri cuadrać despartis sö te componëntes originares de n cöce pompeian y te interseziuns modernes de vidri razionai y trasparënć, ponü olache la Talvera va adöm cun l'Isarch, por lié adöm le nord y le süd dla cité.

1999

2003

Al é propi le cöce, le vider, le zemënt y l'acià che caraterisëia la iesta nöia dl frabicat. Na conzeziun architetonica moderna y n sistem de aieraziun sofistiché tlassifichëia la sënta dl'EURAC danter les strotöres plü inant dla regiun.
La strotöra architetonica é formada da cin costruziuns scëmples y te n stil razionalist tler: la costruziun a est, l'auditorium, la costruziun zentrala, la biblioteca y la curt. Chilò laìte él i cin seturs de inrescida, sciöche inće la sënta operativa dl Secretariat Permanënt dla Convenziun dles Alpes  y l'EURAC convention center,  zënter di convëgns modern y competitif.